Aksènt skèrpi
Normalmente, na papiamentu e énfasis di un palabra ku ta kaba ku un konsonante ta kai riba e último sílaba. E énfasis di un palabra ku ta kaba ku un vokal ta kai riba e penúltimo sílaba. Naturalmente si e regla aki no ta kuadra ku realidat nos ta uza aksènt skèrpi. Pa palabranan ku aksènt grave no tin regla spesial, pa uzo di aksènt skèrpi si. Ta pone aksènt skèrpi riba tur palabra polisilábiko.
1. Esaki ta kaminda e aksènt skèrpi ta kai serka un palabra ku ta kaba ku un vokal.
- Piská
- Informá
- Kachó
2. Esaki ta kaminda e aksènt skèrpi ta kai serka un palabra ku ta kaba ku un konsonante.
- Fásil
- Hóben
- Miéntras
Esaki no ta inkluí palabranan ku ta kaba ku un shua.
Shua ta palabranan ku ta terminá ku: l, r, n i m (ehèmpel laken, peper, angel)
3. Esaki ta kaminda e énfasis ta kai riba kualke otro kaminda ku no ta último òf penúltimo:
- Sílaba
- Sientífiko
- Áwaseru
Eksepshon
1. Si e sílaba ku énfasis mester risibí un aksènt grave i un aksènt skèrpi, no ta pone aksènt riba e sílaba.
2. No ta pone aksènt skèrpi riba palabranan kaminda e énfasis ta kai riba e último sílaba, i ta kaba ku un diptongo dekresiente òf un triptongo.
- Kabai
- Kòrsou
3. No ta pone aksènt skèrpi riba tabata ni tabatin.
4. No ta nesesario pa pone aksènt skèrpi na lèter kapital.